%20(2).jpg)
මාන අත්දැකීම් ලද පුද්ගලයන් ඇසුරු කිරීමට ලැබීම, අන්තර්ජාතික ව්‍යාපෘතිවලදී මට ලැබෙන අමතර වාසියකි.
එක් අවස්ථාවකදී, 1998 සිට 2004 දක්වා ලොව උසම ගොඩනැඟිල්ල වූ මී. 452ක් උස තට්ටු 88කින් යුත් මැලේසියාවේ පෙට්‍රෝනාස් නිවුන් කුලුනු ඉදි කිරීමට හවුල් වූ ඉංජිනේරුවකු සමඟ බොහෝ තොරතුරු කතා කරන්නට කාලය ලැබිණි. ඒ, ඔහු අප සමඟ මෑතකදී වෙනත් රටකදී සේවය කරද්දීය. මේ ඉදිකිරීම ගැන මගේ බලවත් උනන්දුවට කරුණක් වන්නේ, පෙට්‍රෝනාස් කුලුන නිල වශයෙන් මහජනතාවට විවෘත වූ 1999දී මා ඔස්ට්‍රේලියානු සමාගමක් සමඟ කොළඹ ලෝක වෙළෙඳ මධ්‍යස්ථාන නිවුන් ගොඩනැඟිල්ලේ පිළිසකර වැඩට සම්බන්ධ වීම නිසාය. ඒ පිළිසකර කිරීම අවශ්‍ය වූයේ මහ බැංකු බෝම්බයෙන් හා ගලධාරී බෝම්බ ප්‍රහාරයෙන්, ආසන්නයේ පිහිටි අලුත් ලෝක වෙළෙඳ මධ්‍යස්ථාන ගොඩනැඟිල්ලට හානි සිදු වී තිබීම නිසාය. එකල ද අපේ කතාබස්වල සුලබ මාතෘකාවක් වූයේ පෙට්‍රෝනාස් නිවුන් ගොඩනැඟිල්ලයි.
2004න් පසුව ඊට වඩා උසින් වැඩි ගොඩනැඟිලි සෑහෙන ගණනක් ලොව පුරා ඉදි වී තිබුණද, පෙට්‍රෝනාස් ගොඩනැඟිල්ලේ සුවිශේෂතා කිහිපයක් නිසා තාමත් එය බෙහෙවින් කතාබහට ලක් වන ඉදිකිරීමකි.
පළමු හේතුව තාමත් එය ලොව උසින් වැඩිම නිවුන් ගොඩනැඟිල්ල වීමයි. දෙවැනි හේතුව පොළොව මට්ටමෙන් උසින්ම පිහිටි ගොඩනැඟිලි දෙකක් යා කරන ආකාශ පාලම එය සතු වීමයි. මේ ද්වි-මහල් පාලම කුලුනුවල 41 වැනි හා 42 වැනි තට්ටු යා කරමින්, පොළොව මට්ටමේ සිට මී. 170ක් පමණ උසින් පිහිටා ඇත. තුන්වැනි හේතුව නම් පෙට්‍රෝනාස් ගොඩනැඟිල්ලේ අපූරු ගෘහ නිර්මාණ ශිල්පයයි. ලෝක පූජිත වාස්තු විද්වතකු වූ සෙසාර් පේලි (César Pelli) විසින් ඉස්ලාමීය මෝස්‌තර රටාවන් ඇසුරු කරගනිමින් නිර්මාණය කළ එය, මැලේසියාවේ ජාතික සංකේතයක් වී තිබීමය.
මගේ මිතුරාගෙන් මට පැහැදිලි කරගැනීමට වුවමනා වූයේ මේ ගොඩනැඟිල්ල සම්බන්ධයෙන් මා මින් පෙර අසා තිබූ එක්තරා කතාවක් ගැනය. ඒ කතාව පෙට්‍රොනාස් කුලුනුවල 41 සහ 42 වැනි තට්ටු දක්වා ආකාශ පාලම ඔසවා ස්ථානගත කරද්දී මුහුණ දුන් බව කියන අකරතැබ්බයක් පිළිබඳවයි. ඉතා ප්‍රසිද්ධ කරුණක් වන්නේ දැවැන්ත වානේ ආකාශ පාලම ඉහළට එසවීම විස්මිත කාර්මික වැඩක් වූ බවත්, ඊට යොදාගත් එසවීමේ තාක්ෂණයන් එතෙක් ලොව භාවිත නොවූ අලුත්ම ඒවා බවත්ය.
මා අසා තිබුණු කතාවේ සඳහන් වූයේ මේ තට්ටු දෙකේ පාලම කෙසේ හෝ ඉහළට ඔසවා ගොඩනැඟිලි දෙකට යා කරද්දී, එම කුලුනු දෙකේ තට්ටුවල උස මට්ටම් අතර වෙනසක් තිබීම නිසා පාලම සවි කිරීම විශාල අලකලංචියක් වූ බවයි. ඊට හේතුව වශයෙන් සඳහන් වූයේ මේ ගොඩනැඟිල්ලේ මිනුම් ගැනීමේදී ස්ථානීය සලකුණු ලබා දී තිබුණේ චන්ද්‍රිකා තාක්ෂණය (GPS) ඔස්සේ බවත්, එසේ සේවාව ලබා ගත් එක චන්ද්‍රිකාවක් වෙනත් තැනකට මාරු කිරීම නිසා ලබා දුන් ඛණ්ඩාංක වැරදුණු බවත්ය.
එහෙත්, මෙය එසේ නොවන බව මගේ මිතුරා පැහැදිලි කළේය. ඔහු තහවුරු කළ කරුණු අනුව, GPS දෝෂයක් නිසා මිනුම් වැරදීම පිළිබඳ කතාව නිවැරදි විය නොහැකිය. කුලුනු දෙකෙහිම පදනම් හා ව්‍යූහය සඳහා අතිශය නිරවද්‍ය මිනුම් භාවිත කරන ලද බව ඔහු කී අතර, ඇත්ත වශයෙන්ම ජීපීඑස් පද්ධතියක් භාවිත වූවා නම් එය ගොඩනැඟිලිවල නිවැරදි සිරස් බව සහතික කිරීමට යොදාගන්නට ඉඩ තිබිණි. කෙසේ වුවද, එහිදී එවැනි දෝෂයක් ඇති වූ බවට පිළිගත හැකි වාර්තාවල සඳහන් නොවේ.
කෙසේ වුවද, කුලුනු දෙකෙහිම නිරවද්‍යතාව සහතික කිරීමට විශාල ප්‍රයත්නයක් ගෙන තිබේ. මන්ද යත්: මී. 58ක් දිග සහ ටොන් 750ක් පමණ බර වානේ පාලම කුලුනු අතරට ස්ථානගත කිරීමේදී සම්බන්ධක මට්ටම් අතර මිලිමීටර කිහිපයකට වඩා අපගමනය වීමෙන් තොරව සම්බන්ධ කිරීම අත්‍යවශ්‍ය වූ නිසාය.
මිතුරාගේ අත්දැකීම් අසද්දී මට යළිත් තහවුරු වූයේ මේ ආකාශ පාලම ඉංජිනේරු ශිල්පයේ විස්මිත ජයග්‍රහණයක් බවයි. පෙට්‍රෝනාස් ගොඩනැඟිල්ල ඉදිකිරීම පිටුපස මොන තරම් අපූරු තාක්ෂණික කතන්දර තිබුණත්, මා මේ වෙලාවේ අවධානය යොමු කරන්නේ එහි ආකාස පාලම කෙරෙහිය. ඕනෑම උස ගොඩනැඟිල්ලක් වුවත් ක්‍රමයෙන් ඉහළට ඉදි කරගෙන යෑමේ ක්‍රමවේද ඒ වන විට ලෝ පුරා භාවිත කරමින් තිබුණේය. එහෙත් අර සා විශාල පාලමක් පොළෝ මට්ටමේදී එකලස් කර, අපේ ලෝක වෙළෙඳ මධ්‍යස්ථාන ගොඩනැඟිල්ලේ මුළු උසටත් වඩා ඉහළින් පිහිටි තැනකට ඔසවා ගොඩනැඟිලි දෙකකට නිසි පරිදි යා කිරීම අදටත් හිතාගන්නට අපහසු දෙයකි.
මේ තට්ටු දෙකේ පාලම සැම්සුන් හෙවි ඉන්ඩස්ට්‍රීස් සමාගම විසින් දකුණු කොරියාවේදී නිපදවා, කොටස් වශයෙන් නැව්ගත කර, ඉන් පසු ක්වාලාලම්පූර් පෙට්‍රෝනාස් වැඩබිමේදී බිම එළා නැවත සවි කරන ලදි. එය මීටර් එකසිය හැත්තෑවක් ඉහළට එසවීමේ මෙහෙයුම සිදු වූයේ 1995 වසරේ මැද හරියේදීය. දින කිහිපයක මෙහෙයුමක් මඟින් මේ දැවැන්ත පාලම නිවැරදි ස්ථානයට එසවීමට එතෙක් ගොඩබිමදී භාවිත නොවූ තාක්ෂණයක් යොදාගැනිණි. ඒ, ඈත සමුදුරේ ඛනිජ තෙල් කැණීම් ආශ්‍රිත කටයුතුවලට මින් පෙර යොදාගත් හයිඩ්‍රොලික් ස්ට්‍රෑන්ඩ්-ජැක් පද්ධතියක් භාවිත කිරීමය.
සරල උස වෙනස්කම්වලට හා එහා මෙහාවීම්වලට ඔරොත්තු දෙන පරිදි වූ පාලමේ වඩාත්ම කැපීපෙනෙන ලක්ෂණය නම් එය කුලුනු දෙක අතර දැඩි සම්බන්ධයක් මඟින් සවි කර නොතිබීමයි. ඒ වෙනුවට, එය ගෝලාකාර බෙයාරින් මත මඳක් පා විය හැකි පරිදි රඳවා ඇත.
පෙට්‍රෝනාස් නිවුන් කුලුනුවල 29 වැනි තට්ටුවේ සිට ඉහළට විහිදෙන ආධාරක දෙකක් මත සවි කර ඇති මේ පාලම, සුළඟ හෝ උෂ්ණත්ව වෙනස්වීම් යටතේ කුලුනු දෙක එකිනෙකින් නිදහස්ව ඉතා මඳ වශයෙන් චලනය වන විට පාලමට තරමක් ලිස්සා යෑමට සහ භ්‍රමණය වීමට ඉඩ සලසයි. මේ නම්‍යශීලී බව නොතිබුණේ නම්, කුලුනු දෙකේ ඉතා කුඩා හෝ වෙනස් චලන හේතුවෙන් පාලම ඉරිතළා විකෘති වීමට ඉඩ තිබිණි.
පෙට්‍රෝනාස් කුලුනු අතර එහා මෙහා යෑමට ඇති මේ ආකාශ පාලම යනු හුදෙක් ගමන් මාර්ගයකට වඩා බොහෝ සෙයින් වැඩි යමකි. එය හදිසි අවස්ථාවකදී ගොඩනැඟිලි දෙක අතරින් එකකින් අනෙකට ඉවත් වීමේ මාර්ගයක් ලෙස ද ක්‍රියා කරයි. ගෝලීය බුද්ධියෙන් නිමාවූ එය, මැලේසියාවේ තාක්ෂණික සහ සංවර්ධන අභිලාෂය සංකේතවත් කරමින්, ලොව පුරා ගෘහ නිර්මාණ ශිල්පීන්ට සහ ඉංජිනේරුවන්ට අඛණ්ඩව ආඩම්බරයක් සහ ආස්වාදයක් සලසයි.
