මානිගේ තීරුව තිස්හය වසරක් තිස්සේ පිළිවෙලට සීරුවට හා නොකඩවා ලියවෙමින් තිබේ. ඒ වගේ දිනෙන් දින ඉහළ යන රසයක් හා මෝරා යන වටිනාකමක් ඇතිව පලවන තීරු ලිපියක් ගැන මා ලොවෙත් අසා නැත. එවන් ලකයක් නැතිව කඩින් කඩ කරගෙන ගිය මගේ විද්‍යා ලිපි, බ්ලොග් හා පත්තර තීරු ලිපි ලිවීමේ මාධ්‍ය කටයුතුවලටත් තිස්හය වසරක් පිරී තිබේ. මේ කාලය තුල මා නොකඩවා ආදරය කළ, හිතවත්කම පවත්වාගෙන ගිය මාධ්‍යවේදීන් කිහිප දෙනෙක් සිටින අතර ඉන් ප්‍රමුඛයෙක් වන්නේ මානි හෙවත් සුන්දර අයියාය .
මට මානි මුලින්ම හමු වන්නේ 1992 අවුරුද්දේ බ්ලුමැන්ඩල් පාරේ දිවයින කන්තෝරුවේදීය. ඒ වනවිට මානිගේ තීරුව ඉරිදා දිවයිනේ සිටි තුන් හැවිරිදි දරුවෙකි . දිවයින කර්තෘ මඩුල්ලේ කැපී පෙනෙන චරිතයක් වූ සුන්දර නිහතමානිද මැල් හමු වන්නට මා පේරාදෙණියේ සිට ආවේ ආචාර්ය නිහාල් සෝමරත්න සමගය .අපේ ගුරුතුමකු මෙන්ම හිතවතකු වූ ආචාර්ය සෝමරත්න මේ ගමනට මාවත් සම්බන්ධ කර ගත්තේ ඒ වනවිට මම පේරාදෙණියේ ඉගෙනුම ලබන අතරවාරයේ විදුසරට ලියමින් සිටි නිසාය . නිහාල් සෝමරත්න යනු පසුකලෙක මානි ලියු ' මහින්දෙ තමයි ඉස්කෝලේ ' පොතේ නමට කල් ඇතිව සාධාරණයක් කර තිබූ පුද්ගලයෙකි. වසර ගණනාවකට කඩන්නට බැරි වූ වාර්තාවක් සමග උසස්පෙළ ගණිත අංශයේ රිසල්ට්ස් ගත් නිහාල් සෝමරත්න පේරාදෙණියේ සිට ඉංජිනේරු පීඨ ඩීන්ගේ රථයෙන් මා සමග කොළඹ ආවේ නුදුරේ පැවැත්වෙන ඉංජිනේරු ප්‍රදර්ශනයට මාධ්‍ය ප්‍රචාරයක් ලබා ගැනිමටටය. ඔහුගේ පාසැල් මිතුරෙක් වූ සුන්දර නිහතමානිද මැල් හෙවත් මානි සහ තවත් මාධ්‍ය මිතුරන් හතර පස් දෙනෙක්ම එදා මුණ ගැසීමට අපට පුළුවන් විය . එවර පැවැත්වුනේ පේරාදෙණිය සරසවියට වසර පණහක් පිරිම නිමිත්තෙන් වූ දැවැන්ත ප්‍රදර්ශනයකි.විද්‍යුත් මාධ්‍ය ඉතාමත් අඩුව තිබු ඒ කාලයේ සමාජ මාධ්‍ය කියා දෙයක් තිබ්බෙම නැත . ඒ වුනත් සුන්දර අයියා ඇතුළු මාධ්‍යවේදීන් අපට ලබාදුන් ප්‍රචාරය නිසා ඉංජිනේරු ප්‍රදර්ශනයට වැල නොකැඩී සෙනග ආහ . මේ දවස්වල පැවැත්වෙන පේරාදෙණි ඉංජිනේරු ප්‍රදර්ශනය ගැන විස්තර දකිද්දී 1992 ඒ හා සමාන සිද්දි මට මැවී පෙනෙයි.
එදා ආචාර්ය නිහාල් සෝමරත්න සමග කොළඹ ආ ගමනේදී මම ඉමහත් සතුටක් ලැබුවේ විශේෂ පුද්ගලයන් දෙදෙනකු හමු වූ නිසාය. පළමුවැන්නා මානිය . දෙවැන්නා කිත්සිරි නිමල් ශාන්තය.
1994 ඉංජිනේරු රස්සාව හැරදමා විදුසර ට පූර්ණකාලීනව එකතු වී මම සුන්දර අයියලා වැඩකළ දිවයින කන්තෝරුව ආසන්නයේ වසරක් ගෙවා දැමුවෙමි. එය මගේ ජිවිතයේ සුන්දරම කාලයකි. දකින්නට හමුවන්නට සිහින මැවූ කලාකරුවන් වන පී විජේසෝම, ජනක රත්නායක, විනී හෙට්ටිගොඩ, සුන්දර නිහතමානිද මැල් වැනි මිනිසුන් අතර ගතකල ඒ කාලයේ අපට වඩාත් හිතවත් වූ පත්තරකාරයා සුන්දර අයියා වන්නට පුළුවන. හවසට කන්තෝරු ඇරී බ්ලුමැන්ඩල් පාර දිගේ අවිදගොස් හෙට්ටියවත්තෙන් සොයිසාපුර යන බසයකට සුන්දර අයියා ඇරලවන්නට ගිය විදුසරේ ගැටයන් දෙන්නෙක් සිටියෝය . මානිගෙ මුවින් ස්ලෝ මෝෂන් එකෙන් නිකුත්වන සුරුට්ටු දුම හා මුසුවූ සාහිත්‍ය රසකතා හා දේශපාලන උපහාස කතා අහන්නට අභිරුචියෙන් සිටි මේ දෙදෙනාගෙන් එකෙක් අසඩක් හෙවත් අසෝක ඩයස්ය. අනෙකා මාය .
අනෙක් අතට මානිගේ සියලු පොත් නිකුත්වීමට පෙර සිටම ඒ ගැන සෑම අදියරක්ම අප්ඩේට් වෙන්නට තරම් මට වාසනාව ලැබෙන්නේ මේ සියලු කටයුතු පිටුපස සිටින කවර හා පිටු නිර්මාණ ශිල්පියා දර්ශන කරුණාතිලක නිසාය . ඔහු මේ දිනවල 'ඉස්තාන්බුල් දිනපොතේ ' වැඩට ලැහැස්ති වෙමින් සිටිනතර මට සතියකට වරක් දෙවරක් කතා කර මෙසේ කියයි.
' මචං සුන්දර අයියගේ වැඩේ ඉවර වුන ගමන් උඹේ පොතේ වැඩේ කරමු . හාද'
සුන්දර අයියාගේ අලුත් පොත නිකුත්වීම සුන්දර මංගල්ලයක් සේ මට දැනෙන්නේ මේ ආදී කරුණු නිසාය .
( 29-09-2025)
No comments:
Post a Comment